Partekatu edukia
Nafarroako Arartekoa den Patxi Vera Donazarrek RNEren Mediodía Navarra programan parte hartu du apirilean, eta erakundeak garatzen dituen jarduketa-motak eta horiek nola tramitatzen diren azaldu ditu.
Elkarrizketan, Verak azpimarratu zuen kasu gehienetan ekimena herritarrengandik abiatzen dela, eta azaldu zuen jardun gehienak kontsultei dagozkiela, nahiz eta eginkizun nagusia administrazio publikoekiko arazoekin lotutako kexak izapidetzea den.
Kexez gain, Arartekoak adierazi zuen erakundeak zerbitzu publikoak hobetzeko proposamenak eta bitartekaritza-eskaerak ere jasotzen dituela. Horri ofiziozko jarduketak gehitu behar zaizkio, zeinak norberaren ekimenez hasten baitira interes orokorreko egoerak hautematen direnean.
Izapidetzeari dagokionez, hauxe esan zuen Patxi Verak: kexa jaso ondoren informazioa eskatzen zaio eragindako administrazioari, kasua aztertzen da eta kexagileari arrazoia ematen zaion ala ez zehazten da. Kasu horretan, erakundeak zenbait ebazpen eman ditzake, hala nola legezko betebeharren gogorarazpenak —ohikoak dira epe-arloan—, gomendioak edo iradokizunak, indarrean dagoen legerian nahi ez diren ondorioak hautematen direnean arauak aldatzeko proposamenak barne.
Era berean, kasu guztietan erantzun arrazoitua ematearen garrantzia azpimarratu zuen, baita herritarrari arrazoia ematen ez zaionean ere. “Zergatia azaltzen diogu eta azalpen juridiko guztiak ematen dizkiogu, erabakia uler dezan”, adierazi zuen.
Esku-hartze horrekin, Arartekoak erakundearen funtzionamendua eta administrazio publikoen aurrean eskubideak defendatzeko egiten duen lana herritarrengana hurbiltzen jarraitzen du.
Partekatu edukia