Partekatu edukia
Patxi Vera Donazarrek, Nafarroako Arartekoak, Radio Nacional de Españaren (RNE) Nafarroako Mediodía Navarra saioan parte hartu du berriki. Bertan, migratzaileak erregularizatzeko ezohiko prozesuaren hasiera aztertu du eta erakundeak arlo horretan duen zeregina azaldu du.
Elkarrizketan, Verak nabarmendu zuen erakundea prozesuaren hasieratik ikuskapen lana egiten ari dela, prebentzio-ikuspegiarekin. «Hasiera hori nola egiten ari den gainbegiratzen ari gara, arazoak saihesten saiatzeko, ondoren konpondu behar izan beharrean», adierazi zuen.
Prozesuaren epea ekainaren 30ean amaituko da eta, Arartekoak azaldu zuenez, prozesu horrek pertsona askori eragiten die, beraz, administrazioen arteko koordinazio handia eskatzen du. Alde horretatik, egokitzat jo zuen tramitazioa errazteko Estatuko Administrazioaren, Nafarroako Gobernuaren eta toki-entitateen arteko lankidetza.
Halaber, adierazi zuen Nafarroan 10.000 pertsona inguruk jaso ditzaketela prozesu horren onurak, horietatik erdiak gutxi gorabehera Iruñean, eta nabarmendu zuen ahalegin handia egin dela aurretiko hitzorduetarako sistemak eta arreta-guneak gaitzeko, dokumentazioaren bilketa eta eskaeren tramitazioa arindu ahal izateko.
Arartekoak ohartarazi zuen, halaber, kasu batzuetan zaila izan daitekeela eskatutako dokumentazioa biltzea, batez ere jatorrizko herrialdeetan lortu behar denean; era berean, ezarritako epeak betetzeko aurrea hartzea garrantzitsua dela azpimarratu zuen.
Bestalde, baimenik gabeko bitartekarien abusuzko jokabideen arriskuaz ohartarazi zuen. Testuinguru horretan, hauxe gomendatu zuen: prozesuan zehar doako laguntza eskaintzen duten gizarte-erakunde egiaztatuetara joatea eta, behar izanez gero, profesional kualifikatuetara ere bai.
Partekatu edukia