Albisteak

Amaia Madinabeitia, Arartekoaren kabineteburua; Patxi Vera, Nafarroako Arartekoa; Maite García, prostituzio- eta salerosketa-programaren koordinatzailea, eta Amaia García, Nafarroako Munduko Medikuak GKEaren koordinatzailea.

Nafarroan prostituitutako emakumeentzako eskubideak

Eskubideak izateko eskubidea: emakume prostituituak Nafarroan txostenaren ondorio nagusiak partekatu dituzte Nafarroako Munduko Medikuak GKEko ordezkariek eta Nafarroako Arartekoak. Zehazki, txostenaren helburua hauxe da: ikusaraztea, dokumentatzea eta aztertzea Foru Komunitatean prostituzio-egoeran edo sexu-esplotaziorako salerosketa-egoeran dauden emakumeei arreta ematean antzemandako eskubide-urraketak.

Gizarte-erakundeekiko lankidetza- eta hurbiltasun-konpromisoa dela-eta, Arartekoak Munduko Medikuen egoitza bisitatu du. Zehazki, bisita horren helburua izan da ezagutzea prostituzioa eta salerosketa jasan duten emakumeak gizarteratzen, babesten eta indarberritzen lagunduko duten arau-aldaketen eta aldaketa teknikoen aldarrikapenak eta proposamenak.

GKEko ordezkariek Arartekoari jakinarazi diote beharrezkoa dela 14/2015 Foru Legea arlo guztietan aplikatzea. Horretarako, prostituzioa eta sexu-esplotaziorako salerosketa benetan eta eraginkortasunez aitortu beharko dira emakumeen aurkako indarkeria gisa. Era berean, hauek defendatu dituzte, besteak beste: gizarte-arretarako diskriminaziorik gabeko sarbidea eskaintzea, norbait genero-indarkeriaren biktima dela adierazten duen akreditazioa berritzeko edo bikoizteko eskakizuna berehala desagerraraztea, eta osasun-arreta jasotzea bermatzea.