Albisteak

Salhaketak Iruñeko espetxearen egoeraren mapaketa aurkeztu du

Nafarroako Arartekoa, Patxi Vera, azaroaren 6an bildu zen presoen eta preso ohien eskubideen defentsan eta sustapenean lan egiten duen Salhaketa Nafarroa elkarteko ordezkariekin.

Lan-saioan “Nafarroako espetxe-errealitatearen mapaketa” ezagutarazi zen. Hala, Iruñeko espetxearen egungo egoeraren azterketa da hura, eta Nafarroako Gobernuak 2022an osasun-eskumena hartu ondoren espetxeko osasun-arretari buruz egindako ikerketa hartzen du barne.

Salhaketa Nafarroatik azaldu zutenez, mapaketak Iruñeko espetxeari buruzko ikuspegi zehatza eta kritikoa eman nahi du, barruan gerta daitezkeen egiturazko gabeziak eta eskubide-urraketak identifikatzeko, bai eta hainbat ikuspegitatik positiboki baloratzen diren alderdiak ere.

Osasun-arretari dagokionez, presoen eskubideen aldeko elkarteko ordezkariek positibotzat jo zuten Nafarroak eskumena bere gain hartu izana. Espetxeko osasun-mentalaren egoera kezkagarria dela adierazi zuten, haien ikuspuntutik dramatikoa baita, nahiz eta hobetzeko egindako ahaleginak aitortu zituzten.

Gaur egun, Iruñeko espetxeetako biztanleria 385 pertsonatik gorakoa da, eta horietatik % 93,9 gizonak dira; emakumeak, berriz, % 6,7, Salhaketak argitaratutako datuen arabera.

Bestalde, Patxi Vera Arartekoak Nafarroako gizarte-erakundeekin (Salhaketarekin, besteak beste) duen konpromisoa berretsi zuen, eta bere ordezkariak animatu zituen espetxeko osasun-zerbitzuari buruzko kontsultak planteatzera edo kexak bidaltzera.

Nafarroako Arartekoaren bulegoan egindako bilerara honako hauek joan ziren Salhaketaren aldetik: Salhaketako koordinatzailea, Libertad Fránces; Leyre Pueyo, Herritarrentzako Arreta Bulegoko eta Espetxeetako Errealitatearen Behatokiko legelaria; Andoni Burguete, Espetxeetako Errealitatearen Behatokiko politologoa; Gaizka Huarte, praktiketako ikaslea, eta Oumayma El Ouardani, praktiketako ikaslea. Arartekoaren aldetik, Patxi Vera Arartekoa eta Amaia Madinabeitia kabineteburua joan ziren.

ARGAZKI-OINA: Ezkerretik eskuinera: Oumayma El Ouardani, praktiketako ikaslea; Leyre Pueyo, Herritarrentzako Arreta Bulegoko eta Espetxeetako Errealitatearen Behatokiko legelaria; Libertad Fránces, Salhaketako koordinatzailea; Amaia Madinabeitia, Arartekoaren kabineteburua; Patxi Vera, Arartekoa; Gaizka Huarte, praktiketako ikaslea, eta Andoni Burguete, Espetxeetako Errealitatearen Behatokiko politologoa.