Partekatu edukia
Nekazaritza, Merkataritza, Industria eta Turismoa
Gaia: Falta de tramitación de reclamación en materia de consumo
Exp: 10/482/A
Nº: 134
Merkataritza
2010eko ekainaren 10ean, [?] jaunak aurkeztutako idazki bat sartu zen erakunde honetan. Haren bidez, kexa bat aurkeztu zuen Familia, Gazteria, Kirol eta Gizarte Gaietako Departamentuaren aurka, kontsumo arloan jarritako erreklamazio bat ez izapidetzeagatik.
Azaltzen zuenez, 2009ko irailaren 5ean, [?]-ren aurkako erreklamazio bat aurkeztu zuen ([?] zenbakiko orria), Nafarroako Gobernuko Kontsumo Atalera igor zezaten.
Erreklamazioaren izapidetzeari buruzko informaziorik jaso ez zuenez, interesdunak eskabide bat aurkeztu zuen 2010eko ekainaren 4an, informazio hori eskatzeko.
Azaltzen zuenez, 2010eko ekainaren 7an, telefono-dei bat jaso zuen, eta hartan adierazi zioten “igorritako orria ez zela erreklamazio bat, baizik eta kexa bat”, eta horrenbestez, ez zela inolako jarduketarik abiarazi.
Interesdunak adierazten du ez dagoela ahozko erantzun horrekin ados (berak dioenez, “erreklamazio” bat aurkeztu zuen, orrian hitzez hitz jasotzen den bezala), eta gaiari buruzko erantzun idatzirik ez duela jaso dio.
Kexa aztertuta, erakunde honek zehazki esku hartzeko zer aukera zituen jakiteko, erakunde hau bera arautzen duen uztailaren 3ko 4/2000 Foru Legeak ezarritakoari jarraiki, azaldutako gaiari buruzko txosten bat eskatu zion Familia, Gazteria, Kirol eta Gizarte Gaietako Departamentuari.
“Kontsumo arloko erreklamazio bat ez izapidetzeari buruzko kexa bat aurkeztu du [?] jaunak (10/482/A espedientea). Ondokoa adierazi behar dizut gai horri buruz bidali zenidan idazkiari erantzunez:
Idazki hori Kontsumo Zerbitzuari igorrita, hura baita kexaren xede den arloaren eskumena duena, ondokoa adierazi dute:
Aztergai dugun auziari buruz egin beharreko egiaztapenak eginda egiaztatu ahal izan dugu [?] jaunak erreklamazio-orri bat aurkeztu zuela, zeinaren bidez adierazi baitzuen ez ziotela [?]-n erositako arraina garbitu eta berak garbitu behar izan zuela etxean, nahiz eta horren publizitatea egiten duen afixa egon. Euro bateko kalte-ordaina eskatzen zuen.
Hasiera batean, eta nahiz eta idazki hori erreklamazio-orri baten bidez aurkeztu, kexa soil gisa hartu zen, gertakariak hain munta txikikoak zirenez gero. Erreklamazio-orria izapidetzeari buruz galdetze aldera ekainaren 4an aurkeztutako idazkia ikusita, harremanetan jarri ginen [?] jaunarekin, bere idazkiari kexen tratamendua eman zitzaiola adierazteko. Hartutako erabakiarekin ados ez zegoela ikusita, kasuko erreklamazio-inprimakia bere etxera igortzea erabaki zen, kexa izapidetzeari ekiteko.”
Aurkeztutako kexan aipatzen da Kontsumo Zerbitzuak ez zuela 2009ko irailaren 5ean [?] enpresaren aurka egindako erreklamazio bat izapidetu.
Agerikoa da ezen, herritar batek aurkeztutako erreklamazio baten aurrean, alde batera utzita zein den haren edukia edo garrantzia, Administrazio eskudunak hura tramitatu behar duela, eta interesdunari hari buruzko informazioa eman behar diola. Hori ondorioztatzen da Administrazio Publikoek administrazio-prozedura oro ebatzi eta hartutako erabakiak jakinarazteko betebehar orokorretik, Herri administrazioen araubide juridikoaren eta administrazio prozedura erkidearen azaroaren 26ko 30/1992 Legeko 42. artikuluak ezarritako betebeharretik. Betebehar horrekin bat, Nafarroako Foru Komunitateko Administrazioari buruzko Foru Legeak herritarrei aitortzen die eskubidea dutela Administrazioak arrazoizko epe batean arta ditzan haien aferak (7. artikulua).
Administrazio publiko batera jotzen duen herritar orok eta haren esku-hartzea eskatzen duen orok eskubidea du, gutxienez ere, hura izapidetu dadin eta erantzun bat eman diezaioten, alde batera utzita aurkeztutakoa eskabide bat, eskaera bat, erreklamazio bat, salaketa bat, kexa bat nahiz beste edozein kalifikazio ematen zaion ezein idazki den.
Kasu honetan, interesdunak “erreklamazio-orri” gisa kalifikatutako idazki bat aurkeztu zuen (zehazki, [?] zenbakikoa), eta eredu normalizatu bat baliatu zuen; erakunde honek, hortaz, ez du ulertzen zer arrazoi egon daitekeen Administrazioak beste kalifikazio bat eman diezaion, auziaren zenbateko ekonomikoaren muntak ez baitu justifikatzen beste kalifikazio bat ematea.
Kontsumo Zerbitzuak idazki hari kexa baten tratamendua eman nahi baldin bazion, hartutako erabaki horren berri eman behar zion interesdunari, eta ondoren izapidetu.
Horrenbestez, erakunde honek legezko betebeharren gogorarazpena egin behar dio Familia, Gazteria, Kirol eta Gizarte Gaietako Departamentuari, kontsumitzaileek aurkezten dizkioten erreklamazio guztiak izapidetu ditzan, horren emaitzaren berri haiei emanez.
Horrenbestez, erakundea arautzen duen foru legeko 34.1 artikuluarekin bat,
Familia, Gazteria, Kirol eta Gizarte Gaietako Departamentuari gogoraraztea legez behartuta dagoela kontsumitzaileek aurkeztutako erreklamazio guztiak izapidetzera eta izapidetze horren emaitzaz eta espedienteaz informatzera, azken erabakia zein ere den.
Bi hilabeteko epea ematea Familia, Gazteria, Kirol eta Gizarte Gaietako Departamentuari ebazpen hau onartu duela jakinaraz dezan eta horren ondorioz hartuko dituen neurriei buruz informa dezan, edo, bestela, ebazpena ez onartzeko arrazoiei buruz informa dezan. Orobat ohartarazten diot hala egiten ez badu Nafarroako Parlamentuari igorriko diodan urteko txostenean sartuko dudala kasua, uztailaren 3ko 4/2000 Foru Legeko 34. artikuluko bigarren idatz-zatian jasotzen den moduan.
Nafarroako Arartekoa
Francisco Javier Enériz Olaechea
Partekatu edukia